محمد شتا:أجهزة الدولة تصحح المسار الخاطى بقطاع السيارات وتضبط الاسعار العشوائية
أكد محمد شتا المتحدث الرسمى لحملة خليها تصدى زيرو جمارك 2019 أن قرار رئيس الوزراء مصطفى مدبولي لضبط و السيطرة علي أسعار العربيات في السوق المصري من أهم الاخبار التى وجدت صدى كبير فى الشارع المصرى …
مضيفآ فاكرين لما كنت بقولكم إن أجهزة الدولة المختلفة بتساند و بتدعم و واقفة في ظهر حملة #خليها_تصدي_زيرو_جمارك_٢٠١٩ أكبر حملة توعية في مصر علشان خاطر مصلحة المستهلك المصري؟
فاكرين لما كنت بقولكم إن كل القرارات الحكومية المهمة بتاخد وقت علشان تتم دراسة كل الأبعاد و يطلع القرار بشكل مدروس جيداً و شامل وليس بشكل عشوائي؟
فاكرين لما قلتلكم إن سوق السيارات المصري هينضف و إن الاستغلال و الاستغفال و السرقة و النصب هيختفوا من السوق و لن يرجعوا مرة تانية؟
أهو قرار رئيس الوزراء ده بيأكد علي وقوف الدولة إلي جانب المواطن و المستهلك المصري و بمثابة تكملة للقرارات الحكومية الأخري و تتويج لمجهودات الحملة و لترابط المليون و ٩٠٠ ألف عضو و عضوة علي مدار السبعة أشهر الماضية في هدف سامي و نبيل و هو محاربة الاستغلال و النصب و السرقة في قطاع السيارات بأكمله.
بالإضافة لذلك القرار ده بيأكد جهود الدولة و أجهزة الدولة و الحكومة الحالية في محاربة الفساد و الأوضاع الخاطئة و تصحيح المسار الخاطئ لقطاع السيارات كله علي مدار ال ٣٠ سنة إللي فاتوا بما في ذلك قطاع التجزئة التابع للتوكيلات و المستوردين و الموزعين و التجار و سماسرة العربيات و أيضا قطاع التجميع إللي بيشمل ما يسمي ب “مصانع السيارات” المحليه التي تصنع للسوق و الاستهلاك المحلي فقط و ليس للتصدير و التي هي معروفه أيضا بأسم ورش تجميع العربيات.
القرار ده كمان تأكيد علي عدم إقتناع الحكومة و أجهزة الدولة بكل المحاولات البأسة و اليأسة من ممثلي شعبة السيارات و رابطة التجار و سماسرة العربيات و رابطة “المصنعين” المحليين علي مدار الشهور الماضية بالإضافة إلي عدم اقتنعهم بالأرقام المضللة و الغير موثقة ، و التي كان الهدف منها زيادة الاعباء علي كاهل المستهلك المصري و زيادة الأرباح الغير مبررة ليهم و إبقاء الحال (الغير مقبول) علي ما هو عليه…
الخبر ده خبر حلو و يبعث التفاؤل و أتوقع مزيد من الأخبار الحلوة من مجلس الوزراء و جهاز حماية المنافسة في الفترة المقبلة و أتوقع كمان إهتمام إعلامي غير مسبوق بالخبر ده و بمجهودات الدولة و الحملة في محاربة الاستغلال و الأسعار العشوائية في قطاع السيارات…
محدش يسمع كلام و ينخدع من الإعلانات الممول بتاعت التوكيلات و الموزعين و التجار و سماسرة العربيات علي الفيسبوك و محدش يسمع كلام و ينخدع من الصبيان و الهتيفة و المطبلاتيه و الخدامين المرتشين بتوع التوكيلات و التجار علي اليوتيوب و الفيسبوك، و محدش يسمع كلام و ينخدع من مواقع بير السلم و الأقلام المأجورة في مجلات بير السلم أو ملاحق الإعلانات الأسبوعية بتاعت الجرايد و محدش يسمع كلام و ينخدع من الأقلام المأجورة و شلة المرتزقه و المرتشين بتوع شله #فودافون #كاش، علشان كل دولا بيجروا ورا السبوبة و الإعلان و مصلحتهم هما بس زي ما شفتم علي مدار السبعة شهور إللي فاتت، و لسه مازالوا بيهجموا الحملة سواءً علنيا أو من تحت لتحت زي بتوع التوكيلات و مصانع المفكات و ورش التجميع بالضبط…
و طبعاً محدش يشتري أي عربيات دلوقتي و محدش يروح معرض أوتوماك فورميولا في شهر سبتمبر علشان الأسعار لسه هتنزل تاني في أخر سبتمبر و أخر ديسمبر علشان لسه في شوية مفاجأت و قرارات و أخبار حلوة تانية جايه في السكة في الفترة إللي القادمة …
و دايمآ خليكم فاكرين: الحاجة إللي تغلي ما تشتروهاش 😉
عموماً أنا قلت اجيبلكم الخبر الحلو ده يوم الخميس علشان تستمتعوا به طول نهاية الأسبوع و كمان علشات القرار المهم و التطور الإيجابي ده هيكون موضوعنا انهاردة بالليل في اللايف فيديو الأسبوعي بتاعنا …
إللي عايز يقول رأيه في قرار رئيس الوزراء ده أو عنده أي استفسار أو كومنت يكتبه تحت في كومنت أو تعليق و هجاوب عليه أثناء اللايف فيديو انهاردة بالليل …
