– أكثر من ٧٠ مليون جنيه أنفقت على مسلسل سمك لبن تمرهندى يسمى ” مأمون وشركاه ” قصة خيبانه بدون أحداث تم اقحام فيها علاقة المسلمين بالمسيحيين واليهود بسطحية وسذاجة متناهية ، فقط يضطرنا لمشاهدته النجم عادل إمام الذى يتحرك فى ثلاث ديكورات ثابته ( ربنا يعطيه الصحة ) !!.
– خالد ذكى فعلا القيصر رزانه ومصداقية وابداع ، و معه يوسف الشريف الذى يختار كل أدواره بعناية شديدة .
– فيه حاجه غلط فى وجه يسرا ، مش عارف هل هو مكياج زيادة ، ولا فلاتر كاميرات ، ولا عملية تجميل وضربت ، عموما يسرا متألقة !!.
– من حق شركات الملابس الداخلية تعمل الحملات الاعلانية الضخمة والمستفزة ، لأن سعر البوكسر بقى أغلى من القميص ، الله يرحمه اللباس أبودكه راح وساب لنا أبو قعدة !!.
– بصراحه اعلان حديد عز ضرب اعلان حديد أبوهشيمة فى مقتل ، فعلا ضربة مرزبة ولا ١٠٠ خبطة شاكوش !!.
– المدير التنفيذى لشركة أبحاث المشاهده إبسوس قال فى حوار للشروق : ازاى تتهمونا بالعمل ضد الأمن القومى المصرى ورئيس الوزاء عين محمد عبدالمتعال مدير قناة ام بى سى مصر عضوا فى مجلس أمناء اتحاد الاذاعة والتليفزيون ، وكلامه منطقى ، و عداه العيب ، الغلط عندنا وربنا يسامحه اللى وقعنا فيه ومش عايز يصلح غلطته !! .
– اللى شوه ليالى الحلمية لازم يتحاكم ، صحيح جزء ضايع ولا يتابعه أحد وسبوبه وخلصت ، لكن حرام نضيع كلاسيكيات الدراما التليفزيونية و تاريخ أسامه أنور عكاشه واسماعيل عبد الحافظ !!.
أيمن الشندويلى
Shandwely@hotmail.com
